Վալերի Բրյուսովի անվան պետական համալսարանում իրավիճակը շարունակում է լարված մնալ՝ նախօրեին Հակակոռուպցիոն կոմիտեի գործողությունների հետևանքով։ Ինչպես հայտնի է դարձել, մայիսի 14-ին կոմիտեի կողմից նախաձեռնված քրեական վարույթի շրջանակում կաշառք տալու և ստանալու մեղադրանքով ձերբակալվել են համալսարանի ամբիոններից մեկի վարիչը՝ Գայանե Եղիազարյանը, և դասախոսական կազմի մի քանի անդամ։
Համալսարանի ներսում տեղեկացված աղբյուրների համաձայն՝ ռեկտոր Դավիթ Գյուրջինյանը շարունակում է պահպանել լռություն՝ չտրամադրելով որևէ պաշտոնական արձագանք կամ ինստիտուցիոնալ պաշտպանություն դասախոսական կազմին։ Այս լռությունը, որը տևում է արդեն մի քանի օր, ավելի է խորացնում անվստահության մթնոլորտը և ստեղծում է ճգնաժամային իրավիճակ։
Համալսարանի ներսում լայնորեն քննարկվում է ղեկավարության կողմից փաստացի ինքնամեկուսացումը։ Դասախոսներից շատերը զգում են, թե իրենք լքված են իրավապահ և հանրային ճնշումների դեմ պայքարում։ Իրավիճակը ավելի է բարդանում նրանով, որ ռեկտոր Գյուրջինյանը, ըստ տեղեկությունների, կրկին արտերկրյա կամ մասնավոր շրջագայության մեջ է և ֆիզիկապես բացակայում է բուհից։
Այս պահին համալսարանի աշխատանքները փաստացի կառավարում է պրոռեկտոր Գևորգ Հակոբյանը, որը զբաղված է Քաղաքացիական պայմանագիր կուսակցության քարոզարշավով՝ բուկլետներ բաժանելով և չունենալով բավարար ժամանակ բուհի ներքին խնդիրներին անդրադառնալու համար։
Իրավիճակը ստեղծել է լարվածություն, որի արդյունքում դասախոսական կազմի մի մասը խուսափում է հրապարակային հայտարարություններ կատարել՝ մտավախություն ունենալով, որ կարող է հայտնվել հաջորդ «թիրախային ցուցակում»։ Միևնույն ժամանակ, ուսանողների շրջանում էլ աճում է անվստահությունը համալսարանի կառավարման նկատմամբ։
Հանրային դաշտում ավելի ու ավելի հստակ է հնչում մեկ հիմնական հարցը՝ ինչու է համալսարանի ղեկավարությունը լռում այն պահին, երբ բուհը հայտնվել է ծանր հեղինակային և կառավարման ճգնաժամի մեջ։ Ըստ քննարկումների՝ եթե ռեկտորը իսկապես ունի ասելիք, ապա այն պարտավոր է արտահայտել հենց այս պահին, ոչ թե հերթական ուղևորությունից հետո։
