Ուկրաինայի Գերագույն ռադայի պատգամավոր Ռոման Կոստենկոն հայտարարել է, որ Ռուսաստանի նախագահ Վլադիմիր Պուտինի և Ուկրաինայի նախագահ Վլադիմիր Զելենսկիի հնարավոր հանդիպումը կարող է տեղի ունենալ միայն այն դեպքում, եթե խոսքը վերաբերի Ուկրաինայի տարածքների փոխանցմանը Ռուսաստանին։
Ըստ պատգամավորի՝ նման սցենարը ներկայումս անիրատեսական է, քանի որ Ուկրաինայի դիրքորոշումը հստակ է։ Կիևը չի պատրաստվում հանձնել իր տարածքները և չի ճանաչի դրանք որպես ռուսական։ Այդ պատճառով, նրա գնահատմամբ, մոտ ապագայում երկու երկրների առաջնորդների հանդիպումը քիչ հավանական է։
Ավելի վաղ Զելենսկին հայտարարել էր, որ պատրաստ է հանդիպել Պուտինի հետ՝ հակամարտությունը ավարտելու նպատակով՝ նշելով. «Մենք պետք է ավարտենք պատերազմը»։
