Այսօր ես այցելել եմ «Armenian Helicopters» ընկերություն՝ ծանոթանալու նրա գործունեությանը, զարգացման ռազմավարությանը և ավիացիոն ոլորտում իրականացվող ծրագրերին։
Ընկերության ներկայացուցիչները մանրամասն ներկայացրին իրենց աշխատանքները պետական նշանակության ծառայությունների, բժշկական և զբոսաշրջային ոլորտներում։ Զրույցի ընթացքում քննարկվեցին բազմաթիվ հնարավորություններ։
Մեզ ներկայացվեցին բժշկական տարհանման և շտապ բժշկական ուղղաթիռային թռիչքների հնարավորությունները, որոնք կարող են էականորեն բարելավել բժշկական ծառայությունների մատուցումը մեր երկրում։ Կարևորվեց նաև արկածային տուրիզմի և փոքր ավիացիայի զարգացման ուղիները՝ որպես տնտեսական աճի և զբաղվածության նոր աղբյուրներ։
Հանդիպմանը ներկայացվեցին պետական գերատեսչությունների՝ Ներքին գործերի նախարարության և Շրջակա միջավայրի նախարարության հետ համագործակցության և համատեղ ծրագրերի հնարավորությունները։ Կողմերը կարևորեցին մասնավոր և պետական հատվածների միջև արդյունավետ համագործակցության կարևորությունը՝ ի նպաստ շրջակա միջավայրի պահպանության և բնակչության անվտանգության ապահովման։
