Եվրոպական կրոնի կամ համոզմունքի ազատության ֆորումը (FOREF Europe) հայտարարել է, որ Նիկոլ Փաշինյանի կառավարության կողմից Հայ Առաքելական Եկեղեցու նկատմամբ իրականացվող գործողությունները լուրջ սպառնալիք են կազմում կրոնի և համոզմունքի ազատությանը Հայաստանում, որը համարվում է աշխարհի առաջին քրիստոնեական երկիրը։
Կազմակերպությունը նշում է, որ այս հակամարտությունը կարող է ոչ միայն խաթարել Հայաստանի ներքին կայունությունը, այլև ազդեցություն ունենալ երկրի ազգային ինքնության և մշակութային ժառանգության վրա՝ շարունակվող տարածաշրջանային լարվածության պայմաններում։
Ըստ FOREF Europe-ի՝ վերջին մեկ շաբաթվա ընթացքում կառավարությունը զգալիորեն խստացրել է ճնշումը Եկեղեցու վրա։ Կազմակերպությունը հատկապես անընդունելի է համարում կիրառվող մեթոդները, որոնք, նրա կարծիքով, ուղղված են կրոնական ազատության և Հայաստանի Սահմանադրության սկզբունքների դեմ։
Հատկանշական է պաշտպանության նախարար Սուրեն Պապիկյանի հրամանը, որով փետրվարի 1-ից դադարեցվել է Հայաստանի Զինված ուժերի Հոգևոր ծառայության գործունեությունը։ Այս քայլը, ըստ FOREF Europe-ի, փաստացի վերացնում է ռազմական հոգևոր սպասավորության ինստիտուտը, որը գործում էր 1997 թվականից։
Ավելի լայն ճնշումների մասին տեղեկությունները ներառում են նաև երկու արքեպիսկոպոսների և երեք եպիսկոպոսների նկատմամբ սահմանված արտագնա արգելքները, որոնք կանխում են նրանց մասնակցությունը փետրվարի 16-19-ը Ավստրիայում նախատեսված եպիսկոպոսաց ժողովին։
Կազմակերպությունը նաև ուշադրություն է դարձնում Հայ Առաքելական Եկեղեցու պաշտպանության օգտին հանդես եկած բազմաթիվ եպիսկոպոսների, արքեպիսկոպոսների և այլ անձանց ձերբակալություններին և կալանավորումներին։ Նրանցից շատերը շարունակում են մնալ կալանքի տակ՝ մեղադրվելով հրահրում, թմրանյութերի հետ կապված հանցագործություններ և իշխանությունը բռնի կերպով զավթելու փորձեր։
FOREF Europe-ի հայտարարության մեջ նշվում է, որ այս իրադարձությունները հանդիսանում են ավելի լայնածավալ հալածանքների արշավի մաս, որը շարունակվում է 2025 թվականի կեսերից։
