Ամերիկայի Միացյալ Նահանգներ կատարած աշխատանքային այցի շրջանակում ՀՀ սփյուռքի գործերի գլխավոր հանձնակատար Զարեհ Սինանյանը Նյու Յորքում հանդիպել է ՄԱԿ-ում ՀՀ մշտական ներկայացուցիչ, դեսպան Պարույր Հովհաննիսյանի հետ։
Հանդիպման ընթացքում զրուցակիցները քննարկել են սփյուռքահայ համայնքների հետ համագործակցության խորացման հնարավորությունները։ Զարեհ Սինանյանը և Պարույր Հովհաննիսյանը նաև անդրադարձել են միջազգային հարթակներում Հայաստանի ներկայությունն առավել տեսանելի դարձնելու և հայ համայնքների ներուժի արդյունավետ ներգրավման հարցերին։
Դեսպան Պարույր Հովհաննիսյանը ներկայացրել է ՄԱԿ-ում Հայաստանի ներկայիս առաջնահերթությունները և կազմակերպության գործառույթների շրջանակում իրականացվող գործընթացները։ Նա ընդգծել է, որ սփյուռքի ներգրավվածությունն ու աջակցությունը կարող են կարևոր դեր խաղալ այդ գործընթացների հաջող իրականացման գործում։
Գլխավոր հանձնակատար Զարեհ Սինանյանը, իր հերթին, ներկայացրել է Սփյուռքի գլխավոր հանձնակատարի գրասենյակի նախաձեռնությունները, որոնք ուղղված են հայրենադարձության և սփյուռք-հայրենիք կապերի ամրապնդմանը։ Նա նշել է, որ միջազգային համագործակցությունը և դիվանագիտական կառույցների հետ շարունակական կապը անհրաժեշտ են այդ ծրագրերի արդյունավետ իրագործման համար։
