Ղազախստանի նախագահ Կասիմ-Ժոմարտ Տոկաևը հայտարարել է, որ Ադրբեջանի և Հայաստանի կողմից խաղաղության համաձայնագրի հասնելու ուղղությամբ արձանագրված առաջընթացը պատմական շրջադարձային կետ է։ Այս մասին նա նշել է «Զայեդ» մարդկային եղբայրության մրցանակի դափնեկիրներին ուղղված տեսաուղերձում։
Ըստ նախագահի՝ նման քաղաքականությունը բացառիկ բարոյական և քաղաքական նշանակություն ունի այն ժամանակներում, երբ աշխարհը գնալով մասնատվում է։ «Այս փորձը ցույց է տալիս, որ նույնիսկ երկարատև հակամարտությունները կարող են լուծվել երկխոսության, պատասխանատվության և զսպվածության միջոցով։ Հակամարտություններով և բաժանումներով նշանավորված դարաշրջանում այս հաջողությունը ցույց է տալիս, որ հաշտեցումը նշանակում է ուժ, այլ ոչ թե թուլություն»,- նշել է Տոկաևը։
Նա նաև հավելել է, որ Ղազախստանի համար Ադրբեջանը և Հայաստանը մտերիմ, եղբայրական երկրներ են։ Նախագահը բարձր է գնահատում մեր երկրի նկատմամբ ցուցաբերված վստահությունը, այդ թվում՝ Ալմաթիում խաղաղության բանակցությունների կարևոր փուլի հյուրընկալումը։ «Սա հաստատում է մեր ընդհանուր սկզբունքը, որ առաջ շարժվելու միակ ճանապարհը երկխոսությունն է»,- ընդգծել է Տոկաևը՝ նշելով, որ Ղազախստանը մշտապես աջակցում է այն նախաձեռնություններին, որոնք ամրապնդում են խաղաղությունը, վստահությունը և համագործակցությունը Եվրասիայում և ամբողջ աշխարհում։
Նրա խոսքով՝ «Զայեդի» մրցանակը կրում է հզոր բարոյական ուղերձ, որը վերահաստատում է, որ եղբայրությունը համընդհանուր սկզբունք է և գործնական հիմք՝ անվտանգությունը, զարգացումը և մարդկային արժանապատվությունը ապահովելու համար։ Այս մրցանակը, ըստ նախագահի, մարմնավորում է Շեյխ Զայեդ բին Սուլթան Ալ Նահյանի ժառանգությունը, որը հիմնված է հանդուրժողականության, փոխադարձ հարգանքի և խաղաղ համակեցության վրա։
