Այսօրվա կառավարության նիստում քննարկվելու և հաստատվելու է նոր նախագիծ, որը կփոփոխի և կլրացնի ԽՍՀՄ Խնայբանկից դրամական ավանդների դիմաց փոխհատուցման տրամադրման կարգը։
Այս փոփոխությունները կատարվում են այն պայմաններում, որ «Հայաստանի Հանրապետության 2026 թվականի պետական բյուջեի մասին» օրենքի 7-րդ հոդվածով սահմանվել էր, որ 2026 թվականին շարունակվում է «ՎՏԲ-Հայաստան Բանկ» ՓԲԸ-ում ավանդատու հանդիսացող քաղաքացիների՝ նախկին ԽՍՀՄ Խնայբանկի ՀԽՍՀ հանրապետական բանկում մինչև 1993 թվականի հունիսի 10-ը ներդրված դրամական ավանդների դիմաց փոխհատուցման տրամադրումը։ Այս իրավունքը տարածվում էր մինչև 1944 թվականի դեկտեմբերի 31-ը ներառյալ ծնված անձանց, ինչպես նաև Հայաստանի Հանրապետության պաշտպանության մարտական գործողությունների մասնակիցների և սահմանամերձ համայնքներում բնակվող այլ սոցիալական խմբերի վրա։
Նախագծի կյանքի կոչումից հետո առաջացած խնդիրների պատճառով կառավարությունը նախաձեռնել է օրենքում լրացուցիչ փոփոխություններ։
Նոր կարգավորումը կներառի հետևյալ հիմնական կետերը․
1. Փոխհատուցման սուբյեկտների ընդլայնում: Փոխհատուցման իրավունքը կընդլայնվի՝ ներառելով նաև մինչև 1944 թվականի դեկտեմբերի 31-ը ներառյալ ծնված անձանց։
2. Կանխիկ վճարման ընթացակարգի վերացում: Որոշում է կայացվի, որ ավանդի դիմաց փոխհատուցման կանխիկ եղանակով վճարման ընթացակարգերը կորցնեն իրենց ուժը։
3. Էլեկտրոնային վճարման համակարգի կատարելագործում: Մինչև սույն որոշումն ուժի մեջ մտնելը նշանակված, սակայն չդադարած և վճարման կանխիկ եղանակն ընտրած ավանդատուի կողմից տվյալ ամսում փոխհատուցումը չստանալու դեպքում նրա տվյալները կարող են ներառվել յուրաքանչյուր հաջորդ ամսվա կանխիկ եղանակով փոխհատուցման էլեկտրոնային վճարման ցուցակում, սակայն ոչ ավելի, քան մինչև 2026 թվականի մարտ ամսվա վճարման ցուցակում։
Այս փոփոխությունների նպատակն է ապահովել 2026 թվականին ավանդների փոխհատուցման իրավունքի ճանաչման և վճարման բնականոն ընթացքը՝ անկանխիկ եղանակով։
