Արդարադատության նախարար Սրբուհի Գալյանը, Լոռու մարզպետ Արեն Մկրտչյանը և Քրեակատարողական ծառայության պետ Ծովինար Թադևոսյանը այսօր այցելել են «Վանաձոր» քրեակատարողական հիմնարկ՝ ծանոթանալու համար դատապարտյալների պահման պայմաններին և հիմնարկի կյանքը բարելավող նոր նախագծերին։
Այցի ընթացքում պաշտոնատար անձինք ուսումնասիրել են հիմնարկի բարեկարգված տարածքները, այդ թվում՝ նոր վերանորոգված տեսակցության սենյակները, գրադարանը, մարզասրահը և մանկական խաղասենյակը։ Նախարար Սրբուհի Գալյանը զրուցել է անազատության մեջ պահվող անձանց հետ՝ լսելու նրանց առաջարկները և մտահոգությունները։
Այցի առանձնահատուկ կարևորությունը հիմնարկում նոր բացված ուսումնաարտադրական կենտրոնն էր։ Այստեղ նախատեսվում է իրականացնել զոդման դասընթացներ՝ դատապարտյալներին տրամադրելով նոր հմտություններ և հնարավորություն՝ վերականգնվելու համար։ Կենտրոնը սարքավորվել է նորագույն սարքավորումներով և հաստոցներով։
Այս նախագիծը Հայաստանում Եվրոպայի խորհրդի և ՀՀ արդարադատության նախարարության համագործակցության շրջանակում իրականացվում է «Իրավական կրթության և վերականգնողական ծրագրերի իրականացման կենտրոն» ՊՈԱԿ-ի կողմից։
